Pupils and Friends

شاگردوں کی کثرت

مرزا صاحب کے شاگرد اطراف ہندوستان میں بے شمار تھے۔ ان کی وسعت اخلاق اور عام رضاجوئی نے یہ دائرہ بہت وسیع کر دیا تھا۔ جو شخص اصلاح کے لیے ان کے پاس غزل بھیجتا تھا ممکن نہ تھا کہ وہ اس کے خط کا جواب اور اس کی غزل میں اصلاح دے کر نہ بھیجیں۔ اگرچہ مرزا کی فطرت شاعری میں اپنے طبقے کے لوگوں سے اس قدر بلند واقع ہوئی تھی کہ وہ کسی شاگرد یا مستفید کو اپنے ساتھ ساتھ نہیں لے چل سکتے تھے، جیسا کہ انھوں نے خود ایک فارسی شعر میں اس مضمون کی طرف اشارہ کیا ہے؛ وہ کہتے ہیں:

باایں ہمہ اہل دہلی و نواح دہلی میں چند اصحاب جو مرزا کے فیض صحبت اور مشورۂ سخن سے زیادہ مستفید ہوئے تھے ان کے ارشد تلامذہ سمجھے جاتے تھے؛ جیسے نیر رخشاں، عارف، سالک، مجروح، علائی، تفتہ وغیرہم۔ ان کے سوا خاص اہل دہلی میں کچھ لوگ ایسے بھی تھے جو عرفاً مرزا کے شاگرد نہیں سمجھے جاتے تھے لیکن درحقیقت ان کے شاگرد معنوی تھے؛ جیسے نواب مصطفے خاں مرحوم، جنھوں نے مومن خاں مرحوم کی وفات کے بعد ہمیشہ اپنا کلام، فارسی ہو یا اردو، مرزا ہی کو دکھایا؛ یا جیسے سید غلام علی خاں[1] مرحوم متخلص بہ وحشت، جو مرزا کے حد سے زیادہ ماننے والے اور معتقد اور ان کی صحبت سے مستفیض رہے تھے۔ مرزا نے انھیں دو نو صاحبوں کی طرف اپنی ایک اردو غزل کے مقطع میں اشارہ کیا ہے اور کہا ہے:

لطیفہ

یہ دو نو صاحب باہم نہایت گہری دوستی رکھتے تھے؛ یہاں تک کہ ان کی دوستی عشق کے درجے تک پہنچ گئی تھی۔ ایک دفعہ، جبکہ راقم بھی جہانگیر آباد میں موجود تھا، سید غلام علی خاں مرحوم نواب صاحب سے ملنے کو آئے ہوئے تھے؛ اور مرزا صاحب نے بھی ان کا یہاں آنا سن لیا تھا۔ انھیں دنوں میں مرزا کا خط نواب صاحب کے نام آیا؛ اس میں خاں صاحب کو بھی سلام لکھا تھا؛ اور اخیر میں خواجہ حافظ کے مشہور شعر کا پہلا مصرع اس طرح بدل کر لکھا تھا:

ایک عزیز نے یہ لطیفہ سن کر کہا کہ خواجہ حافظ کے اصل شعر میں اس قدر لطف نہ تھا جیسا کہ اس موقع پر مرزا صاحب کے اس تصرف سے اس میں لطف پیدا ہو گیا۔

مرزا صاحب کے ان شاگردوں کا حال، جن کے نام کے بہت سے خطوط اردوئے معلیٰ اور عود ہندی میں مرزا کے لکھے ہوئے موجود ہیں، یہاں لکھنے کی ضرورت نہیں؛ اس لیے ہم صرف دو صاحبوں کا مختصر ذکر اس مقام پر لکھتے ہیں؛ ایک نواب ضیاء الدین احمد خاں مرحوم اور دوسرے نواب مصطفے خاں مرحوم؛ کہ غالباً ان دو نو بزرگوں میں سے کسی کے نام کا کوئی خط مرزا کے اردو مکاتبات میں نہیں ہے جس سے ان کی خصوصیت مرزا صاحب کے ساتھ خاص و عام کو معلوم ہو۔

نواب ضیاء الدین احمد خاں

نواب ضیاء الدین احمد خاں، جو فارسی میں نیر اور اردو میں رخشاں تخلص کرتے تھے، قطع نظر کمال شاعری و انشا پردازی کے تاریخ، جغرافیہ، علم انساب، علم اسماے رجال، تحقیق لغات اور جنرل انفارمیشن (عام واقفیت) میں اپنا نظیر نہیں رکھتے تھے۔ اگرچہ انھوں نے فنون مذکورہ میں کوئی مستقل تصنیف اپنے نام سے نہیں چھوڑی؛ لیکن اکثر مصنفین ان سے مدد لیتے تھے اور جو مشکل پیش آتی تھی اس میں ان سے مشورہ کرتے تھے؛ خصوصاً الیٹ صاحب نے جو ہندوستان کی تاریخ کئی جلدوں میں لکھی ہے اس کی تصنیف و ترتیب میں نواب ممدوح نے بے انتہا مدد پہنچائی تھی، جس کا مصنف نے اپنی کتاب کے دیباچے میں خود اعتراف کیا ہے۔

چونکہ نواب ممدوح اہل کمال کے عاشق تھے اور خاص کر مرزا صاحب سے ان کی حقیقی چچازاد بہن منسوب تھیں اس لیے مرزا کے ساتھ ان کو خاص تعلق تھا۔ وہ فارسی اور اردو دو نو زبانوں میں فکر شعر کرتے تھے؛ مگر زیادہ تر فارسی نظم و نثر لکھتے تھے اور مرزا کے قدم بقدم چلتے تھے۔ مرزا نے جو ایک قصیدہ نہایت بلیغ و لطیف نواب ممدوح کی شان میں لکھا ہے اور جس میں ان کا استاد ہونے پر فخر کیا ہے اس کے کچھ اشعار مختلف مقامات سے التقاط کر کے یہاں لکھے جاتے ہیں:

نواب محمد مصطفے خاں

نواب محمد مصطفے خاں مرحوم، جو فارسی میں حسرتی اور اردو میں شیفتہ تخلص کرتے تھے، اگرچہ مرزا کے تلامذہ میں شمار نہیں ہوتے تھے بلکہ جب تک مومن خاں مرحوم زندہ رہے انھیں سے مشورۂ سخن کرتے رہے؛ لیکن خان موصوف کی وفات کے بعد ریختہ اور فارسی دو نو زبانوں میں وہ برابر مرزا کو اپنا کلام دکھاتے تھے؛ اور اگر ہمارا قیاس غلط نہ ہو تو مرزا کے بعد ان کے معاصرین میں سے کسی کی فارسی غزل ان کی غزل سے لگا نہیں کھاتی تھی؛ اور شعر کا جیسا صحیح مذاق ان کی طبیعت میں پیدا کیا گیا تھا ویسا بہت ہی کم دیکھنے میں آیا ہے۔ لوگ ان کے مذاق کو شعر کے حسن و قبح کا معیار جانتے تھے۔ ان کے سکوت سے شاعر کا شعر خود اس کی نظر سے گر جاتا تھا اور ان کی تحسین سے اس کی قدر بڑھ جاتی تھی۔ یہی وہ شخص تھے جن کی نسبت مرزا غالب فرماتے ہیں:

نواب ممدوح کی شان میں بھی مرزا کا ایک فارسی قصیدہ ان کے دیوان میں موجود ہے، جس میں اول فخریہ تشبیب لکھی ہے؛ فخریہ اشعار لکھتے لکھتے کہتے ہیں:

حواشی

[1] یہ صاحب دلی کے ممتاز لوگوں میں تھے۔ ان کے والد کا نام سید فرحت اللہ خاں تھا اور مولانا رشید الدین خاں مرحوم کے داماد تھے۔ قطع نظر علم و فضل کے اردو اور فارسی دو نو زبانوں میں نہایت خوش بیان اور شعر کا مذاق اعلیٰ درجے کا رکھتے تھے۔ اول سرکار انگریزی میں ملازم رہے، پھر الور میں فوجدار ہو گئے، پھر لکھنؤ میں نواب سعید الدولہ مرحوم نائب وزیر کے توسط سے، کہ ان سے قرابت قریبہ رکھتے تھے، ایک معزز خدمت پر ممتاز ہو گئے؛ وہاں سے پھر الور چلے آئے تھے اور غدر تک وہیں رہے۔ غدر کے بعد اخیر عمر تک سررشتۂ تعلیم میں منسلک رہے؛ اور نواب مصطفے خاں مرحوم ان کی ہر حال میں مدد کرتے رہے۔ ۱۲

[2] چونکہ نواب صاحب شراب سے مجتنب تھے اور مرزا پیتے تھے اس لیے ان کی نسبت چاے پیمائی اور اپنی نسبت بادہ پیما کا لفظ کہا۔

[3] معلوم ہوتا ہے کہ نواب نے مرزا کی مدح میں کوئی قصیدہ لکھا تھا جس کی طرف ان دو نو بیتوں میں اشارہ ہے۔ ۱۲

[4] یعنی پسند نہ کر دہ